(C7) 價值觀

 

價值觀是一種處理事情判斷對錯、做選擇時取捨的標準。不同的價值觀會產生不同的行為模式，進而產生不同的社會文化。

人有不一樣的價值觀和態度，而大家會在人生道路上遇不同的人，有同道中人也有持相反的價值觀。

今日這篇文章主要是呻最近不快樂的事，我太弱和執著這些瑣事，一直放不下。可能是我太小氣，但很生氣和不知道怎面對這些事情。

事一

朋友P是一個較貪小便宜的人，以一個日本慳錢大人"桐谷廣人"為偶像，以他為學習對像和目標。活力跑是一個由政府搞的活動，可以免費報名，最重要是有紀念品(紀念t-shirt和禮物)，大家分別各報了3km(P)和10km(我)的活動。

星期日是領取選手包的日子，相約左先在海旁跑一會兒，再前往九龍公園領取或者食野(預下午茶)。當日天氣還好，只是多雲，但P體能不太好，只可以跑一小段，而我獨自跑到紅磡盡頭再約在星光大道等。之後行左去高鐵站和九龍公園領取選手包後，大約差不多二點半，然後就話去搵野食。

P先生超級貪小便宜的心態出現了，價值觀分歧出現，首先他又厭貴，又話去spaghetti house食下午茶點知執左，又提議上iSquare頂層食肆看，但我拒絕左，上面邊有符合心水的價格又啱佢的野食，上去咁麻煩。我提議簡簡單單去寶勒巷果邊搵間茶餐廳食，或者去較便宜的吉野家食，但他拒絕左，又厭唔好味。又行左一大輪行左去佢之前食過的日本餐廳，結果冇下午茶，最後企左係門口係度係電話look openrice，冇一間啱心水。果時差唔多三點半，最後佢話11點幾食左野，唔肚餓，唔洗食咁多野。當下我好嬲就話，咁好喇一齊返紅磡搭火車回家了(P.S. 佢有東鐵全月通)。我好嬲，全程都冇再出聲了。結果落車道別後，自己一條友四點幾先走去食野，反而一個人最自在。

有時候，人之間總有差異和不同的態度，這次已經不是第一次發生，而且佢又唔係話窮，住私樓人工唔低。不過我唔係介意佢依種性格，反而介意係佢唔理會其他人的感受，我已經提早在whatsapp問佢食唔食飯，點知佢自己11點幾去茶餐廳食左野先出黎，跟住成個去程我已經提及一陣去邊度食野好，但佢掛住玩電話，睇邊度有jetso，而去到又厭三厭四，已經唔係價錢高同平的問題。其實我好肚餓，果日跑左6km同行左2萬步，我都唔想發脾氣，講咁多都無謂，搭車返去最直接。係依件事上，可能我是過份強求別人一樣的心態，但我唔鍾意言而無信和沒有體諒他人的人。如果一早講定唔食野，我就早係屋企提早食飯，連下午餐都唔洗食。

(P.S. 佢份人又要好味又貪小便宜，好似有集團優惠 4人晚餐限主餐牌的$300現金優惠 冇最低消費，一個意粉都過$150，跟住佢會連續一晚食兩次。另外一次的優惠券是規定分單，結果好似慳錢家族，三個人分別坐三張四人枱食，跟住同我抱怨果間餐廳麻煩和衰。)

後記，最後跑步當日P又諸多藉口，話果日試跑整到，仲好累呀等等，冇參加。

結果變成我自己一個人去跑10km，但我反而更自在開心，望住幾歲小朋友一個鐘都行得完的3km笑而不語，恭喜佢好成功好自豪咁免費拎到件衫又唔洗跑。

前一日的對話，明明約好左，但事與願違。

事二

每個人對於每件事的心態不太一樣，當然唔可以強迫其他人接受，也唔可以介意。單純紀錄下一些事。

自小的成長的環境唔太好，沒有太多的玩具，有幾次玩遊戲/換左/買左d小玩具返黎，打算送俾外甥仔女。但佢地自小對於物質從不或缺，不懂得珍惜眼前所擁有。

有好多次，佢地都唔太鍾意份玩具，結果我自己拎返黎玩。又或者我送俾佢的玩具，可能過幾日就已經唔記得左。當下講到自己好鍾意和想要，但得手後卻把我珍而重之的拋諸腦後。

雖然唔應該跟小朋友去比較各自的價值觀，但有些事情背後，我花了很多心機和時間體力去換取，結果就是這樣的結果，有點不爽。究竟自己應唔應該繼續花心機去付出，而別人不太會珍惜的野呢。或者應該是出於愛，但當這份愛的價值只是0，內心果種失落只有自己知。

回望小時候，什麼都沒有，什麼是喜歡也弄不清，新一代真的很幸福。

事三

我是個較為完美的人，希望一切都依照自己所預計去安排，所有野都會花好多時間去安排準備和研究。

事源看到自助餐優惠打算一家人去食，研究左怎樣最方便，最便宜，跟住問左A答左，B又話要再考慮，C又話點解唔叫D，跟住一大輪來來回回，過左數日，沒有優惠，一切都只能落空。

每次對於其他人來說，可能只是一個message，但背後我花左好多心機。可能對於其他人眼中冇咪算，價錢唔係問題，貴咪照去，但所有野已經唔係我所想。我已經再沒有動力去計劃所有野，大家的要求和價值觀都唔同。一個又厭貴，一個又厭冇野食，一個話時間地方又難遷就，所以唔搞就最好。有時候，一個人最自在，唔洗煩，想做就去做。

總結

我咁樣公開講係好小氣，但一直都屈埋係心好唔舒服，依家總算講左出黎而唔再成為我自己的祕密。對於某些人成人講，去行山/跑步/旅行/食飯點解唔搵其他人，我心諗你又唔陪我，講咁撚多，到我安排又厭三厭四，又話你唔接受批評，花咁多心血去討好所有人卻變成吃力不討好。人與人之間的距離很遠，往往你在乎的變成別人的不在乎，你顧慮其他人卻得不到相同對待，正常知道其他人睡覺，卻一大早大聲說話開收音機。雖然家人不應過份計較，但就是這樣封閉自己比較好吧！

在生命中，太多人的價值觀唔同，看待和處理事情上都不太一樣，特別是很討厭那些自以為看通世事卻得把口的人，靜係不停踩低別人，而唔係提供有建設性和可行行為。所以面對唔同人的心態都要不同，唔好咁執著這些瑣事。

唔好諗咁多，我鍾意點諗我的事，你唔鍾意咪唔好睇，我想做就去做。

即使一個人，也要笑著活下去！